Unkahi Dastaan

*******

‘Rohan, haath mooh dho kar aa jao, khana ban gaya hai’ maa ne kitchen se awaaz lagaye.

Rohan daudta hua aaya, handwash kiya, facewash kiya aur dinning table par aakar baith gaya.

‘kya banaya hai mumma?‘

‘tere favourite Rajma Chawal banaye hain’

‘arre wah, Rajma chawal to mere bhi favourite hain’ peeche se aate hua papa ne kaha phir rohan ke sar par haath phera aur pucha ‘aur champ, kaisa raha tumhara cricket match’

Dukaan se wapas aaye papa ko dekh kar rohan ka chehra khil-khila utha. ‘aaj pata hai kya hua papa’

‘nahi mujhe kaise pata’ papa ne chutki lete hue kaha.

Bus phir kya Rohan cricket match ki saari details dene laga ‘phir pata hai kya hua papa, last 2 balls main humme 3 run chahiye the jeetne k liye. aur phir second last ball par Jatin ne square cut karke boundary maar di’ rohan ne khil-khilate hue kaha. Khushi uske chehre par saaf jhalak rahe the.  

‘issi liye to rohan ki favourite kheer banaye hai’ maa ne muskurate hue kaha aur kheer ka bowl dinning table par rakha. Rohan din bhar ki baatein mumma papa ko batata raha, aur dono uski chatpati baatein sun kar kabhi muskurate aur kabhi thake maar kar haste.

*******

‘Rohan, khana lag gaya hai, haath mooh dho kar aa jao’  mumma ne dinning table par khana rakhte hue awaaz lagaye.

‘Rohan, khana Thanda ho raha hai’ jab 15 min tak Rohan apne room se nahi aaya to maa ne phir awaaz lagaye.

5-7 mins baad rohan aaya, ‘sorry mumma’. Maa ki lagaye plate uthaye aur apne room ki taraf jaane laga.

‘arre, ye kya tareeka hai, room main akele khana kyu khana hai, yaha sabke saath baith kar khao’

‘mom, mere dost mera wait kar rahe hain’ ye keh kar Rohan apne room main chala gaya.

Maa ne papa ki taraf dekha, ‘baccha bada ho gaya hai, maa baap se jyada dosto ka saath chahiye hota hai’ papa ne maa ko samjhate hue kaha.

Ye daur tha 2000-2001 ka, internet ne apne kadam just jamana shuru kiya tha. Gen Y ab computer main interest develop karna chahti thi, internet seekhna chahti thi. Ye wo daur tha jab bacche internet par movies dekh sakte the, game khel sakte the, floppy disk main document save karke apne dosto k saath share kar sakte the.

*******

 ‘Rohan se baat hue thi?’ papa ne maa se pucha.

‘Nahi phone nahi laga uska.’ Maa ne kaha ‘shayad dosto k saath movie dekhne gaya hai.’

Ye daur tha Orkut ka, Rohan ab College main padne ne liye Lucknow chala gaya tha. Mobile phone aa gaye the par maa-papa ka call Rohan din main 1 hi baar pick karta. Rohan ki mostly activities ki info maa ko Orkut se hi milti. Ye wo daur tha jab 50 ke recharge par 1500 SMS free mila karte the. Call charges abhi bhi students k liye expensive the to bus phir kya Rohan Rs 50 ka sms pack activate karata aur din bhar apne dosto se sms par baatein karta.

Dheere dheere dost apne apne future par focus karne lage. Koi CAT ki prep kar raha tha, to koi GATE ki. Koi campus placement ki. Dheere dheere sms exchange ka silsila kam hone laga.

*******

Rohan ab engineering khatam karke bangalore ki 1 MNC main software engineer ki job karne laga tha. Ab daur aa chuka tha facebook aur whatsapp ka. Facebook par fiend list main 1500 se Jayda log added the. Din raat facebook par posts daal kar likes aur comments lene ki hodd lage hue thi. Rohan bhi issi daud main laga hua tha.

Aaj Rohan ka birthday tha. Facebook par 50 comments aur 150 like. Rohan ne phone main call records check kiye to maa ki 14 miss calls thi. Rohan ne call records scroll kiye to realize hua ki aaj wo kitna akela ho gaya hai. Peechle 30 din k call records main maa-papa k call k alawa 1 bhi call nahi tha. Aur wo bhi sirf incoming. Internet ki is duniya main logo se personal interaction kab khatam ho gaya pata hi nahi chala. Aaj Rohan serious depression main tha. Wo recall nahi kar paa raha tha ki last time wo apne dosto se kab mila tha. Client calls k alawa uska human interaction almost zero tha. Bachpan main chubula, natkhat hone wala Rohan aaj ek Introvert ho gaya tha. Logo se 5 min face to face baat karne main bhi use hich-khichat hoti.

Maa facebook par Rohan ka account dekh hi rahe thi ki itne main message aaya, ‘User doesn’t exist’. Maa ko samajh nahi aaya. Maa ne socha Rohan ko call karke puchu ki wo uska account kyu nahi dekh paa rahe hai.

Maa ne call kiya to phone receive nahi hua. Maa ne phone disconnect kiya to dekha Rohan ka message aaya hua tha ‘Sorry Mumma Papa’